HESIAN eta KAOTIKO TALDEETAKO FRAN URIAS eta XABIER ALDAZ DBHko IKASLEEKIN EGON DIRA

Fran hitzaldiaren uneetako batean

Duela aste gutxi, Andra Mari Ikastolak bere III. Arte Proiektua jarri du abian.

Aldaz DBH 4ko ikasleekin

Aurten, proiektua musikarekin lotua egonen denez, Euskal Herriko oholtzetan berezko argiarekin dizdira egiten duten bi izar handirekin berbetan aritzeko aukera izan dute ikasleek: Hesian taldeko Fran Urias eta Kaotiko taldeko Xabier Aldaz, geurera hurbildu ziren eurekin solasean aritzera. Lehenak DBH 2ko ikasleei egin zien bisita, eta bigarrenak aldiz, DBH 4koekin izan zuen hitzordua.

Xabier Aldaz eta Fran Uriasekin izandako elkarrizketak, oso-oso emankorrak izan ziren. Oso gustora aritu ziren ikasleak beraiekin solasean. Gainera, bi artista gonbidatuei eginiko galdera andanari eskerrak, Hesian eta Kaotiko taldeen nondik-norakoak ezagutzeko parada ere izan zuten ikasleek. Tankera eta kolore guztietako galdera zaparradari egin behar izan zioten aurre bi musikariek:

Ikasleek Kaotiko taldearen
berri izan zuten

Fran ikasleei
abesti bat kantatzen

Noiz jakin zuten musikari izan nahi zutela, zergatik erabaki zuten bateria eta kitarra ikastea eta ez bete edozein instrumentu, nolakoa den musikariaren bizitza, nola den diska bat edo bideoklip bat grabatzearen prozesua, zeri buruz mintza diren euren abestietan, zer sentitzen den milaka pertsonen aurrean jotzen denean, noizko euren hurrengo kontzertua Sakanan... edo egia ote den musikariek asko ligatzen dutela dioen mitoa!!! Denetarikoak galdetu zizkieten geure ikasleek Xabier eta Frani!!! A ze pagotsa eurena!!

Fran Urias DBH 2ko
ikasleen galderak erantzuten

Fran Uriasen kasuan gainera, Hesianeko abeslariak kitarra ekarri zuen ikastolara, eta zenbait abesti jo zituen gure ikasleentzako. Adi-adi egon ziren hauek Frani begira, eta askok, ixilpean bazen ere, Franekin batera abestu zituzten berak jotako abestiak... Ño!!! Benetan politak Franek eskeinitako minutu musikalak!!

Xabier jator-jator ikasleekin

Datozen asteetan, Arte Proiektuaren bigarren faseari ekin beharko diote ikasleek, Xabier eta Franekin izandako hizketaldietatik abiatuta, artelan ezberdinak sortu beharko baitituzte. Artelan hauek guztiak gainera, ekainaren 6tik 10era bitartean egongo dira ikusgai Etxarriko kultur etxean, HH eta LHko ikaskideek egindako gainontzeko artelanekin batera. Ez ezazue gal!!! Erakusketa dotorea izango da!!

Amaitzeko, eskerrik asko Fran eta Aldaz, gure ikasleengan musikarekiko zaletasuna hain era polit eta atseginean sustatzeagatik!!! Eskerrik asko zuen bisitagatik!! Azkar espero zaituztegu berriro ere geure artean!!! Jakin, Andra Mari Ikastolatik munduko zorterik onena opa dizuegula zeuen ibilbideetan!!! Eta bide batez, eskaeratxo bat: Ea noiz daukagun Kaotiko eta Hesian hemen inguruan ikusteko aukera... Irrikitan gaude zuek ikusteko, lagunak!!! Bitartean, zaindu eta ongi izan!!!

AUPA HESIAN ETA KAOTIKO!!!